ބ. ނެލިވަރު ސަރަހައްދަކީ ބ.ކުންފުނަދޫ ގެ އިރު އުތުރަށް އޮންނަ އެންމަޑި އެއްވާ ސަރަހައްދެކެވެ. މި ގޮތުން ހަނިފަރު ސަރަހައްދާއި އެއްގޮތަށް ޕްލާންކްޓަންސް ޖަމާވެ، އެއްމަޑި މި ސަރަހައްދަށް އެއްވާ ކަމަށް ރެކޯޑް ކުރެވިފައިވެއެވެ. 2020 ގެ ނިޔަލަށް މި ސަރަހައްދުން 105 އެންމަޑި 119 ފަހަރު ފެނިފައިވެއެވެ. އަދި މި ސަރަހައްދަކީ އެންމަޑި ކާނާ ހޯދުމަށާއި، ވިހާ އާލާވުމަށް މުހިއްމު ސަރަހައްދެކެވެ. މީގެ އިތުރުން މިތަނުގެ އެންމެ ޙާއްޞަ އެއް ސިފައަކީ މިތިލައިގައި އެންމަޑި ސާފުކުރުމަށް ބޭނުންކުރާ "ކްލީނިންގ ސްޓޭޝަން" އެއް އިންނަކަމެވެ. ބ. އަތޮޅަކީ ދުނިޔޭގެ ފެންވަރުގައި އެންމަޑީގެ ބޮޑު އާބާދީއެއް އުޅޭ ސަރަހައްދެއް ކަމަށްވުމުން އެންމަޑީގެ މިފަދަ މާހައުލުތައް ޙިމާޔަތްކުރުމަކީ ވަރަށް މުހިއްމު ކަމެކެވެ. މީގެ އިތުރުން މި ސަރަހައްދުގައި އޮންނަ ނެލިވަރު ފިނޮޅަކީ އައިންމަތީ ދޫނީގެ މުހިއްމު މާހައުލެކެވެ. މި ސަރަހައްދުގެ އޮއިވަރު ދެމެހެއްޓުމަށް މި ފިނޮޅަށް ބަދަލެއް ނުގެނެސް ޙިމާޔަތްކުރުމަކީ މުހިއްމު ކަމެކެވެ.