ހދ. ނޭކުރެންދޫއަކީ އުފެދިފައިވާ ގޮތުން އެރަށުގެ އިރުދެކުނު ފަރާތުގެ ބޮޑުބައެއްގައި ކުޅި، ފާ، ޗަސްބިން ހިމެނޭ ރަށެކެވެ. 162 ހެކްޓަރުގެ މިރަށުގައި މީހުން ދިރިއުޅޭ ސަރަހައްދުގެ ބޮޑުމިނަކީ 31 ހެކްޓަރެވެ. އަދި ކުޅި، ފާ، ޗަސްބިން ހިމެނޭ ސަރަހައްދަކީ 28.3 ހެކްޓަރެވެ. ރާއްޖޭގައި ފެންނަ 14 ބާވަތުގެ މެންގްރޫވް ގަހުގެ ތެރެއިން 6 ބާވަތެއްގެ ގަސް މި ކުޅީގެ ސަރަހައްދުން ފެނެއެވެ. މި ސަރަހައްދަކީ އިރުވައި މޫސުމަށް ގިނަ އަދަދެއްގެ، ގިނަ ބާވަތްތަކެއްގެ ހިޖުރަކުރާ ދޫނި ޒިޔާރަތް ކުރާ ސަރަހައްދެކެވެ. އަދި މީގެ އިތުރުން މިސަރަހައްދަކީ އެކި ބާވަތުގެ ކަކުންޏާއި ގިނަ އަދަދެއްގެ ދިރޭތަކެތީގެ މާހައުލެކެވެ.