މިއީ އައްޑޫ ހުޅުދޫ ހުޅަގުފަރާތުގައި އޮންނަ ބޮޑު ޗަސް ބިމުގެ ސަރަހައްދެކެވެ. މިސަރަހައްދަކީ ބޮޑު ޗަސް ބިމެއް ހިމެނޭ ސަރަހައްދެކަމުން، ރަށަށް ވެހޭ ވާރޭ މިސަރަހައްދަ ފަސޭހަކަމާއެކު ހިދިގެން ދެއެވެ. މިކަމުން ރަށުގެ ތެރޭގައި ފެންބޮޑުވުމުގެ ފުރުސަތު ކުޑަވެގެން ދެއެވެ. މިސަރަހައްދުގެ ފަސްގަޑަކީ ގަސް ހެއްދުމަށް ފަސޭހަ ފަސްގަޑެއްކަމުން، ރަށުގެ ބައެއްފަރާތްތަކުން ދަނޑު ވެރިކަމަށް ވެސް ބޭނުން ކުރާ ސަރަހައްދެކެވެ. މިސަރަހައްދުގެ ދިރުންތަކަށް ބަލާލާއިރު، ދިއްގާ ހިރުދު އަދި ބޯކަށިކެއޮ މިސަރަހައްދުގައި ގިނައަދަދަކަށް ހެދިފައިވެއެވެ. މިސަރަހައްދުގައި ’ކާފަރުބުރު‘ ކިޔާ ފެނުގައި ހެދޭ ބާވަތުގެ ގަހެއް ހެދިފައިވެއެވެ. މިގަސް ބޯވެ، މިސަރަހައްދުގެ ބޮޑުބަޔަކަށް ވަނީ ފެތުރިގައިކަން ފާހަގަކުރެވެއެވެ. މިކަމަކީ މިސަރަހައްދުގައި އުޅޭ ދިރުމަށް ނުރައްކާވުން ކައިރިކަމެކެވެ. އަދި، އެކަމުގެ ސަބަބުން މިސަރަހައްދަށް އަންނަ ދޫނިތަށް އައުން މަދުވުމަކީ ވެސް އެކަށީގެންވާކަމެކެވެ. އެހެންކަމުން މިސަރަހައްދުގެ ދިރުން ރައްކާތެރިކުރުމަށް، މިސަރަހައްދުގެ މާހައުލާއި ނުގުޅޭ ދިރުން މިސަރަހައްދަ ތައާރަފުވެގެން ދިއުން ހުއްޓުވޭފަދަގޮތެއް ހޯދައި ބެލެހެއްޓުން އެއީމުހިއްމުކަމެކެވެ. ހަމައެއާއިއެކުގައި، މިސަރަހައްދަކީ ދަޑުވެރިކަމަށް ބޭނުންކުރަމުން އަންނަ ސަރަހައްދެއްކަމުން، ދަނޑުވެރިކަން ކުރުމަށް ގަސްކަޑައި އަދި ބޭނުންކުރެވޭ ކެމިކަލުކުން މިސަރަހައްދު ރައްކާތެރިކުރެވޭނެ އުސޫލެއްގެ މަތިން އެކަން ކުރެވޭނެ ނިޒާމެއް ގާއިމުކުރުމަކީވެސް މުހިއްމުކަމެކެވެ. އެގޮތުން، މިސަރަހައްދުގެ ދިރުން ދެމިހެއްޓުމައްޓަކައި މިސަރަހައްދު ހިމާޔަތް ކުރެވި ރަގަޅަށް ބެލެހެއްޓިގެން ދިއުމަކީ މުހިއްމު ކަމެއްކަމުގައި ފާހަގަކުރަމެވެ.